A sede da Deputación de Pontevedra en Vigo acolleu este mércores un acto de promoción do xamón da Cañiza no que participaron o alcalde deste municipio, Luís Gómez Piña; o alcalde da cidade olívica, Abel Caballero; e os deputados provinciais socialistas Ana Laura Iglesias e Santos Héctor Rodríguez, entre outros.
Así, a pesar de que a pandemia de coronavirus obrigou a reformular a Festa do Xamón, celebrouse un acto para promocionar este produto, “bandeira” da Cañiza e da comarca, así como o turismo de todo ese territorio.
Tanto Gómez Piña como a deputada Ana Laura Iglesias subliñaron a vinculación de gastronomía, paisaxe e territorio na Cañiza, cuxa festa de exaltación do xamón é unha das máis lonxevas de Galicia, xa que leva celebrándose desde 1967 (e foi declarada de Interese Turístico en 2013).
A pesar das limitacións impostas pola COVID-19, como a suspensión das verbenas, programáronse eventos culturais, como o concerto de Amantes da Terra, o próximo 14 de agosto, dentro do programa Musigal impulsado pola Deputación de Pontevedra.
