A Dirección Xeral de Emerxencias activou a alerta laranxa por altas temperaturas nas Rías Baixas e na zona de Baixo Miño, en Pontevedra, por temperaturas de ata 37 graos.
Segundo a información da Axencia Estatal de Meteoroloxía (AEMET), o fenómeno meteorolóxico está xa en curso e prolongarase ata últimas horas da tarde.
Por este motivo, e co fin de garantir a seguridade dos bens e as persoas, Emerxencias informou da situación aos concellos das provincias afectadas, deputacións, servizos provinciais e agrupacións de voluntarios de Protección Civil, entre outros. Deste xeito, espérase que se adopten as medidas oportunas para garantir a seguridade dos bens e das persoas.
Ante este episodio de altas temperaturas, recoméndase extremar as precaucións, especialmente entre os colectivos máis vulnerables como persoas maiores, nenos, persoas con enfermidades crónicas e tamén no caso de persoas que realizan traballos físicos intensos ou deporte ao aire libre.
Recoméndase limitar a exposición o sol, manter unha boa ventilación e ter en conta os cambios de temperatura. É tamén aconsellable manterse hidratado, tomar comidas lixeiras, cubrirse a cabeza e evitar exercicios físicos prolongados ao sol. Ademais, lémbrase que nunca debe deixarse nenos ou persoas maiores no interior de vehículos pechados.
