A Policía Local de Vigo recolleu, para o seu traslado a un centro de recuperación de aves, a un cárabo común, que foi localizado nunha vivenda da cidade.

Segundo confirmaron fontes policiais, o 092 recibiu un aviso o pasado luns pola tarde, dunha veciña da zona de Travesía de Vigo, que informaba de que tiña no seu domicilio “unha cría de bufo”.

Unha dotación desprazouse ao lugar e comprobou que o animal era un cárabo común, unha ave rapaz de tamaño medio, parecida aos bufos pero sen penachos aos lados da cabeza, e cos denominados ‘discos faciais’.

Os axentes recolleron ao animal e trasladárono a dependencias policiais, para a súa recollida por persoal do Centro de Recuperación de Fauna Silvestre de Cotobade.