O grupo municipal do PP no Concello de Vigo denunciou este luns que a decisión de prorrogar por 5 anos a concesión do servizo de bus urbano que presta Vitrasa baséase en “mentiras” do alcalde, Abel Caballero, ao que acusaron de optar pola opción máis prexudicial para a administración municipal e para os cidadáns: “Só hai unha gañadora, a concesionaria”.
Nunha rolda de prensa, o portavoz do grupo ‘popular’, Alfonso Marnotes, lembrou que o rexedor “se escusou no COVID” para xustificar esa prórroga de 5 anos, e fíxoo meses despois de anunciar que non se ampliaría o contrato e convocaríase un novo concurso. “É mentira que o COVID paralizase a licitación, o alcalde paralizouna antes”, asegurou.
Segundo o concelleiro do PP, tras anunciar a licitación do servizo, o goberno local “non fixo nada, non moveu un papel durante meses” e foi só a principios de marzo, días antes de que se decretase o estado de alarma, cando se tivo a documentación (memoria económica, estudo de viabilidade e borrador do prego). “É unha irresponsabilidade denunciar a prórroga e non tramitar unha nova concesión, unha neglixencia, porque non tiña intención de facelo”, constatou Marnotes.
Así mesmo, apuntou que “tamén é mentira que non houbese outra alternativa e que a empresa puidese abandonar” porque a lei de transportes do ano 1.987, “que impulsou o propio Caballero sendo ministro”, contempla a posibilidade de que se prorrogue unha concesión de forma provisional mentres se está tramitando un novo concurso. “Non iamos quedar sen servizo”, apuntou o portavoz do PP, en alusión a esa posibilidade, esgrimida por Abel Caballero para xustificar a prórroga.
Por outra banda, e ante a advertencia do alcalde de que posiblemente ningunha empresa se presentase ao novo concurso polas incertezas causadas pola pandemia de COVID, Marnotes lembrou que, nestes momentos, a propia Xunta está inmersa en licitacións do servizo de bus interurbano e “hai concorrencia dabondo”.
“DUBIDOSA LEGALIDADE”
O portavoz do PP, que insistiu na “dubidosa legalidade” da prórroga, lamentou, finalmente, que o goberno vigués optase por unha ampliación de 5 anos no contrato, o que non obsta para que a concesionaria reclame compensación económica polas perdas durante o estado de alarma (como xa fixo).
Alfonso Marnotes sinalaron que o Goberno aprobou un Real Decreto que permite ás administracións compensar a esas concesionarias de transporte cunha prórroga que non supere o 15 % do prazo inicial de concesión. No caso de Vigo, poderíase compensar cunha ampliación de contrato de algo menos de 4 anos, e non os 5 acordados, e sen compensación económica adicional.
“Non se usou ese mecanismo (…), decidiuse a prórroga en tres días. Por que esperaron ata o último momento? Que esconden?”, cuestionou, á vez que proclamou que, con esa medida, “perde o Concello e os cidadáns, e só hai unha gañadora, a concesionaria”.
ANULACIÓN DO PREGO
Cuestionado acerca destas críticas, o alcalde de Vigo, Abel Caballero, acusou á oposición de pretender “que se suspenda o transporte urbano”. “Encantaríalles que todas as empresas crebasen (…) algúns se puidese queimaban Citroën”, incidiu.
O rexedor insistiu en que foi el quen decidiu inicialmente a convocatoria dun novo concurso, e que a situación xerada pola pandemia obrigou, segundo o criterio dos técnicos, a optar pola prórroga de 5 anos.
A ese respecto, recoñeceu que, se seguise a licitación, Vitrasa debería continuar prestando o servizo mentres tanto, pero faríao “coas súas condicións”, que imporía ao Concello.
Ademais afirmou que, “con seguridade”, o novo prego sería “anulado” polos tribunais, porque os seus estudos económicos non se axustan á nova realidade. “A convocatoria sería anulada”, reiterou.
