A Universidade de Vigo (UVigo) e a empresa MN Program puxeron en marcha os Premios da Cátedra MN para recoñecer o espírito emprendedor de estudantes universitarios de ramas de enxeñería, así como para potenciar a innovación tecnolóxica.

Segundo precisou a universidade nun comunicado, os sete galardoes que se concederán foron dotados con 30.000 euros e o prazo de presentación de solicitudes permanecerá aberto ata o 24 de xullo.

Así, establecéronse tres categorías para recoñecer os mellores traballos de fin de grao, traballos de fin de máster e proxectos da materia Laboratorio de Proxectos (LPRO) do Grao en Enxeñería de Tecnoloxías de Telecomunicación da UVigo.

Deste xeito, valoraranse a calidade, a orixinalidade e a innovación dos traballos e a achega persoal dos estudantes, así como a utilidade, a aplicabilidade e a viabilidade dos proxectos.

Adicionalmente, terase en conta a adecuación das propostas ás áreas de interese da Cátedra MN, que inclúen a automatización robótica de procesos, a identificación biométrica, a enxeñería lingüística e interfaces de voz, as técnicas avanzadas de intelixencia artificial e a xestión avanzada e masiva de datos.