O tráfico de mercadorías no Porto de Vigo experimentou un descenso do 29 por cento no mes de abril (con respecto a abril do ano pasado), lastrado sobre todo pola caída dos movementos ro-ro (dun 80,3 por cento) debido á suspensión da actividade na planta de PSA e á paralización da Autoestrada do Mar.
Así se desprende do informe presentado este venres no Consello de Administración do Porto, e do que deu conta en rolda de prensa o presidente deste organismo, Enrique López Veiga.
Entre as mercadorías que experimentaron caídas en abril están os automóbiles (-75,23 %), as pezas de automoción (-81,7 %) ou o granito en bruto (-54,9 %); mentres que a froita, os produtos químicos ou os alimentos, están entre as que máis subiron.
No caso da pesca fresca (sen computar a produción das bateas), o descenso no volume foi de algo máis do 50 por cento, mentres que o recorte no valor de venda alcanzou o 31,9 por cento).
Con respecto ao tráfico total acumulado, a terminal olívica alcanzou os 1,3 millóns de toneladas, o que supón un 5,34 % menos que no mesmo período do ano pasado.
A pandemia de coronavirus notouse tamén nos cruceiros, cun descenso do 70 por cento. Así, neste primeiro cuadrimestre do ano atracaron en Vigo 7 cruceiros, fronte aos 17 no mesmo período do ano pasado.
