A Federación de Usuarios do Porto de Vigo (FUPV), que aglutina a varias organizacións e a unhas 600 empresas, volveu reclamar este venres exencións de taxas portuarias, polo menos ata final deste ano, dada a situación “dramática” que atravesan pola caída de actividade derivada da crise sanitaria do coronavirus.
O presidente da Federación, Enrique Mallón, proclamou que “é tempo de exencións, máis que de bonificacións ou adiamentos”, e reiterou que a rebaixa de taxas portuarias (ata un máximo do 20 %) aprobada por Portos do Estado é “absolutamente insuficiente” e mesmo “ridícula”.
Por iso, esta asociación dirixiuse a Portos do Estado (e á Autoridade Portuaria de Vigo) para reclamar que se elabore “un novo Real Decreto” para dar resposta á necesidade destas empresas. “Que sexan valentes, e que apoien aos portos”, pediu, á vez que reclamou que haxa exencións polo menos ata final de ano ou que, se non é posible, se apracen os pagos ata o 2021, porque esa necesidade “é un clamor”.
Enrique Mallón rexeitou a mensaxe de que o Porto de Vigo “vai ben” porque, segundo recalcou, non só o tráfico de cruceiros se reduciu “ao cero por cento”, senón que a inactividade na terminal ro-ro de Bouzas “é practicamente total”. De feito, segundo as súas estimacións, haberá “unha caída do 25 por cento en tráficos e movemento de mercadorías como mínimo, no escenario máis optimista e se non hai rebrotes de coronavirus aquí ou nos países cos que tratamos”.
TAXAS POR ADIANTADO
A ese respecto, o presidente da Federación indicou que é “inadmisible” que haxa empresas pagando taxas, mesmo por adiantado, cando teñen os barcos amarrados, ou cando están case sen actividade debido, entre outros factores, á caída de vendas da canle Horeca (hoteis, restaurantes e cafetarías).
Mallón pediu á Autoridade Portuaria de Vigo “comprensión” e “que se poña do lado” dos usuarios do porto, que son o “motor” da terminal olívica, e sinalou que, se non houbo ata agora solicitudes para acollerse á rebaixa de taxas é porque as empresas ven “ridículas” as bonificacións acordadas.
