A Xunta e o Real Club Celta de Vigo entregarán 11.000 máscaras co escudo e as cores do equipo deportivo a nenos da cidade de modo gratuíto.

Esta iniciativa foi presentada este martes na urbe olívica, onde a delegada territorial da Xunta, Corina Porro, detallou que o club deportivo e a Fundación Celta de Vigo facilitarán a tea coa que se confeccionará o material de protección.

Segundo recolleu o Goberno galego nun comunicado, a confección das máscaras será levada a cabo por 300 voluntarios que colaboran en distintas iniciativas solidarias promovidas pola Administración autonómica.

Así mesmo, Corina Porro puxo en valor a “implicación” e a “disposición” mostradas polo club deportivo en relación a este proxecto e precisou que as máscaras se repartirán na rede de farmacias da cidade e as súas parroquias a través de Cáritas.