Comisións Obreiras (CC.OO.) e Unión Xeral de Traballadores (UGT) lamentaron os falecementos rexistrados en residencias de persoas maiores durante a propagación da pandemia da COVID-19 a pesar de disporse das “suficientes camas” nas Unidades de Coidados Intensivos (UCI) nos hospitais galegos.

A través dun comunicado, os sindicatos aseguraron que a utilización destes recursos “podería evitar mortes” e esixiron “unha explicación” sobre os falecementos de anciáns rexistrados en residencias. Neste sentido, lamentaron que estas persoas “quedasen desasistidas do seu dereito a ser atendidas nun centro hospitalario”.

Neste sentido, as centrais sindicais reprobaron que a Xunta “non informase” o número de usuarios de cada residencia falecidos no seu centro, un hospital ou outro ámbito.

En concreto, UGT e CC.OO. referíronse a os contaxios por COVID-19 rexistrados nas residencias DomusVi de Aldán, en Cangas, e DosmuVi de Barreiro, en Vigo. Así, lembraron que a titularidade destes centros é privada, aínda que se construíron en terreos públicos.

A ese respecto, os sindicatos sinalaron que estas residencias pertencen a unha multinacional con capital británico (ICG) e francés(Sagesse Retraite Sante). Sobre ese punto, lembraron que eses centros son “herdeiros das residencias promovidas pola sociedade público-privada SOGASERSO”, constituída polo bipartito en 2005. Ademais, as centrais apuntaron que esta “perdeu o carácter público” despois de que Alberto Núñez Feijóo asumise a Presidencia do Goberno galego.

Así, os sindicatos reprobaron que nese momento comezase “un camiño promovido pola Xunta” para que esta pasase a ser “a empresa máis grande” do sector na comunidade, onde conta con máis de 30 centros.

Noutra orde de cousas, instaron á delegada da Xunta en Vigo, Corina Porro, a celebrar a reunión comprometida en decembro despois de que presentasen un escrito sobre a situación das residencias na comunidade e as necesidades da dependencia.