A Universidade de Vigo ofrecerá, para o curso 2020-2021, 3.743 prazas de nova incorporación e 1.763 de máster (contando centros propios e adscritos), e incorporará algunhas novidades, como tres novos programas de simultaneidade e catro novos títulos de posgrao (másteres).
Segundo apuntou o vicerreitor de Ordenación Académica e Profesorado, Manuel Ramos, a oferta é “algo dinámico” que debe axustarse cada ano, e lembrou que, no que respecta aos graos, vívese un momento de ‘impass’, xa que en 2021 abrirase o novo mapa de titulacións, que “suporá un cambio importante”.
No próximo curso, a UVigo ofertará tres novos programas de simultaneidade xurdidos da Escola de Enxeñaría Industrial, co que se dá resposta á demanda do propio centro de complementar a oferta coa titulación de Enxeñaría Biomédica. Así mesmo, faise efectivo o acordo alcanzado no Sistema Universitario de Galicia (SUG), que incluía a PCEO (Programación Conxunta de Ensinos Oficiais) en Enxeñaría Mecánica e en Enxeñaría Electrónica Industrial e Automática.
“Os dobres graos, aínda que non se tratan de titulacións propiamente ditas, xa que son programas de estudo formados por titulacións xa existentes, supoñen unha oferta atractiva para o alumnado”, apuntou Manuel Ramos.
Por outra banda, no curso académico 2020-2021 comezará a impartirse, con 20 prazas, a modalidade virtual do Grao de Dirección e Xestión Pública, unha iniciativa pioneira no mapa de titulacións do SUG.
Así mesmo, no caso de titulacións cuxa continuidade estaba en dúbida por baixa matrícula, mantense a oferta (en grao e máster), aínda que condicionada a que a UVigo cumpra os compromisos adquiridos, como presentar novas propostas de títulos que substitúan algunha das titulacións.
NOVOS MÁSTERES
Con respecto aos títulos de posgrao, a UVigo ofertará o próximo curso catro novos másteres: máster en Nanociencia e Nanotecnoloxía (13 prazas), máster en Dirección e Innovación na Cadea de Subministración (30 prazas), máster en Visión por Computador (6 prazas) e máster en Industria 4.0 (15 prazas).
A institución académica viguesa ofertará o mesmo número de prazas de novo ingreso nos másteres, excepto no caso do máster en Enerxía e Sustentabilidade, porque a súa comisión académica decidiu que sería bianual, e o próximo curso non se impartirá.
Con respecto ao máster en Enxeñaría Aeronáutica, tras o acordo coa Universidade da Coruña, seguirase traballando na elaboración do plan de estudos e empezarase a impartir no curso 2021-2022.
