O Hospital Vithas Fátima de Vigo realiza probas de COVID-19 a todas as embarazadas que ingresan para dar a luz mediante extracción venosa.

Segundo indicaron fontes do centro hospitalario, esta medida enmárcase no proxecto ‘Hospital Seguro’ e busca contribuír á “tranquilidade” das familias e a garantir a saúde dos pacientes.

En concreto, a proba que se practica ás mulleres embarazadas detecta anticorpos IgM e IgG cunha sensibilidade do 92% e unha especificidade do 96%. Así, cando a IgM resulta positiva o resultado confírmase co test PCR, que no caso de embarazadas con síntomas de COVID-19 se aplica directamente. A combinación destas probas permite comprobar se a paciente estivo en contacto co virus, se está na fase activa da enfermidade ou se presenta inmunidade.

A coordinadora de xinecoloxía e obstetricia do hospital, Rosa Darriba, sinalou que é posible que “unha baixa proporción de casos” positivos non se poida detectar no momento do ingreso hospitalario. No entanto, incidiu en que dispor do resultado destas probas “permite ás familias vivir con máis tranquilidade e seguridade o nacemento e os primeiros días da vida do seu fillo”.

Así mesmo, esta profesional lembrou que, aínda que non se demostrou que unha nai poida contaxiar a COVID-19 ao seu fillo durante o embarazo, unha portadora si pode transmitirlla ao seu bebé recentemente nado. Por este motivo, insistiu na importancia de coñecer o estado dunha muller embarazada en relación a esta enfermidade antes do parto.