Unha trintena de empresas da lonxa do porto vigués reclamaron á Autoridade Portuaria a exoneración do pago de taxas ocupación, actividade e utilización durante seis meses ou a rebaixa do seu custo á metade pola afectación da crise sanitaria aos seus negocios.

Mediante unha carta remitida ao presidente do Porto, Enrique López Veiga, estas compañías dos sectores da comercialización o transporte e a embalaxe de peixe lamentaron que se lles esixa facer fronte a estes pagos a pesar de perder “unha ampla porcentaxe das vendas a consecuencia da crise”. Así, demandaron que se adopten “medidas urxentes” ante esta situación.

Ademais, os afectados solicitaron á Autoridade Portuaria a revisión das concesións en vigor, “coa redución a futuro das taxas por causa de forza maior en función da realidade económica sobrevinda tras a superación da pandemia”.

En concreto, sinalaron a importancia de que se revise a taxa de ocupación dado que, ao seu xuízo, “o espazo xa non ten, nin terá, o valor que tiña antes da crise”, así como a de utilización posto que a crise cambiou as necesidades do sector. Do mesmo xeito, os empresarios consideraron que a taxa de actividade “débese revisar á baixa dos límites mínimos para a fixación da base impoñible” e que se debe reducir o tipo de gravame.

Ademais, tacharon de “insuficientes” as medidas adoptadas polo Porto recentemente, que seguían as recomendacións de Portos do Estado. Así, a Autoridade Portuaria contemplou o adiamento do ingreso da débeda tributaria das liquidacións correspondentes a taxas portuarias e unha redución temporal dos requisitos de esixencia dos tráficos mínimos de forma excepcional para este ano.