Axentes da Policía Local de Vigo detiveron este martes a un veciño da cidade, I.G.G., de 34 anos de idade, como presunto autor dun delito de violencia de xénero, após golpear supostamente á súa parella.

Segundo informaron fontes policiais, os feitos tiveron lugar na madrugada deste martes, cando unha dotación do 092 acudiu a unha vivenda da zona de Santa Cristina, alertada porque se estaba producindo un episodio de violencia de xénero.

Ao chegar os axentes ao domicilio, abriulles a porta unha muller que estaba a chorar e explicoulles que discutira coa súa parella. No transcurso da pelexa, relatou, o home golpeáraa nun lado da cara (onde presentaba erosións) e desde ese momento notaba un asubío no oído.

Pola súa banda, o presunto agresor alegou que a muller tiña constantes cambios de humor e comportábase ás veces de forma agresiva. Así, declarou aos axentes que a muller se tiña autolesionado.

Os policías detiveron ao presunto agresor, mentres que a muller foi trasladada ao Hospital Álvaro Cunqueiro (HAC) de Vigo.