O transporte marítimo entre Vigo e Cangas suspenderase os domingos e festivos e axustaranse as frecuencias que se estableceron este luns despois de contabilizarse un descenso do 90 por cento na ocupación media das embarcacións durante a vixencia do estado de alarma.
Así o trasladou a Navieira Mar de Ons, que presta este servizo xunto a Rías Galegas, nun comunicado no que precisou que estas medidas se aplicarán desde o vindeiro luns, día 30 de marzo.
En concreto, os horarios foran axustados o día 23 tras a aprobación de novas reducións de operacións no ámbito do transporte polo Goberno e ante o descenso do número de pasaxeiros motivado polas restricións de mobilidade impostas para evitar a propagación do COVID-19.
Dada a baixa ocupación rexistrada, as navieiras optaron por modificar os horarios para “axustar a oferta á demanda” e “reducir a exposición” dos seus traballadores, así como preservar a súa saúde e a dos pasaxeiros.
Deste xeito, de luns a venres, as conexións de Cangas a Vigo realizaranse ás 7,00, 8,00 e 9,00 horas, así como ás 14,00; 15,00; 19,00; 20,00 e 21,00 horas. Os traxectos de regreso realizaranse media hora máis tarde neses mesmos horarios. Mentres, estas frecuencias manteranse os sábados non festivos, fóra das viaxes das 7,00 e as 21,00 horas, así como os traxectos de volta ás 7,30 e as 21,30 horas. En cambios, os domingos e festivos non se prestará este servizo.
Mentres, a conexión da cidade olívica con Moaña, que opera a Navieira Nabia, foi modificada este sábado. En concreto, de luns a venres, os traxectos desde esta localidade a Vigo realízanse ás 7,00; 8,00; 10,00; 14,00; 16,00; 20,00 e 21,00 horas e, os de regreso, media hora máis tarde. Os sábados a conexión Moaña-Vigo está dispoñible ás 10,00; 14,00; 17,00 e 19,00 horas e, os traxectos opostos, media hora máis tarde nesas mesmas frecuencias. Os domingos non se ofrece o transporte marítimo.
