O Concello de Vigo porá en marcha a partir do 27 de marzo unha plataforma cultural ‘en liña’, confinarteconcultura.vigo.org, para reunir e difundir as obras de creadores locais nos días do confinamento decretado para frear a expansión do coronavirus.
Así o trasladou nunha comparecencia o alcalde, Abel Caballero, quen explicou que esta platafoma reunirá diferentes iniciativas artísticas elaboradas por creadores vigueses durante o confinamento.
A ese respecto, o rexedor lembrou que, nestes días, os artistas non deixaron de crear e puxo exemplos como cantantes que actúan desde as súas casas a través de canles ‘en liña’, artistas que se expresan desde os balcóns e xanelas, autores que recitan poemas en redes sociais, ou actores e actrices que publican as súas pezas en diferentes webs.
Así, a partir do venres, a plataforma confinarteconcultura.vigo.org estará dispoñible para que eses artistas propoñan vídeos coas súas creacións e expresións artísticas. Deberán ser vídeos curtos, gravados en formato horizontal, cun peso máximo de 500 Mb e unha duración máxima de 5 minutos.
Ademais, terán que ser pezas (música, teatro, danza, artes plásticas, fotografías, etc.) que fosen creadas durante os días do confinamento.
Con esta iniciativa, explicou Caballero, perséguense tres obxectivos: “confinar” nunha mesma plataforma todas as iniciativas da rede de artistas de Vigo, difundir a creatividade deses artistas, e ofrecer aos cidadáns a oportunidade de ter acceso a contidos culturais exclusivos.
