O pasado martes 24 os coidadores do Centro de Atención para Persoas Dependentes (CAPD) de Chapela, xa denunciaban o risco ao que se estaban a expoñer por falta de medidas sanitarias. Un día despois, a través da información transmitida polos mesmos traballadores, Xornal de Vigo é coñecedor de novos casos positivos en coronavirus.
En total hai xa 5 casos confirmados -contando co primeiro- e 11 persoas illadas. Entre os infectados, destaca a médico que atendía aos enfermos. “Existen sospeitas de que pode haber algún traballador máis contaxiado. Hai quen pasa polas 3 plantas do centro“, argumenta un coidador do centro. “Enfermería e camareiras están indo por todas as plantas”, critica.
CEN BAIXAS LABORAIS
Xustificando o estrés da situación, un total 100 persoas colleron a baixa esta semana, tal e como aseguran as fontes consultadas. “Había que facerlle as probas e se non dan positivo no coronavirus deberían ter que ir a traballar. Imos a ter unha carga de traballo enorme“, sinala unha coidadora do centro. A causa, segundo a mesma traballadora é “porque son xente nova e non aguanta os casos cos que tratamos. Hai postos nos que xa houbo ata tres substitucións”. “É unha fuxida de paxaros”, conclúe.
INICIOUSE O DESINFECTAMENTO
Tras as críticas do persoal traballador e dos pais dos residentes, o centro xa comezou a desinfectar o CAPD. Ademais, o centro xa facilitou máscaras de protección “máis axeitadas” para o persoal da primeira planta do centro.
