Marea de Vigo-Son En Común instou á Xunta a ofrecer axudas para beneficiarios de bolsas autonómicas de comedores escolares ante o peche de colexios aplicado para previr a expansión do coronavirus.
Nun comunicado, a concelleira desta formación Oriana Méndez lembrou que o goberno local puxo en marcha unha iniciativa para abonar 50 euros ás familias con maiores necesidades económicas beneficiarias de bolsas de comedor.
Con todo, reprobou que os comedores de centros escolares de titularidade autonómica “sigan sen dispor dunha medida análoga” por parte do Goberno galego, cuxo “deixamento” a este respecto criticou.
Así mesmo, Marea de Vigo demandou que, polo menos, a Xunta “iguale” a decisión adoptada polo Concello para garantir que “moitos nenos da cidade” dispoñan de acceso á comida “quente e equilibrada” á que podían optar ata a cancelación das clases.
Neste sentido, Méndez incidiu en que o modelo de xestión do comedor escolar dos centros escolares de Vigo “non pode ser motivo de discriminación e menos na situación actual”. Por este motivo, instou ao Executivo galego a que aplique a este respecto a “celeridade” coa que traballou para “recolocar na administración aos seus militantes que ían en listas electorais” para os comicios autonómicos, que foron cancelados pola crise sanitaria.
