A Asociación de Industriais Metalúrxicos de Galicia (Asime) trasladou este venres que as súas empresas están a manter a actividade nun 75 por cento, aínda que a produción pode baixar a próxima semana, e pediu que se manteña o traballo sempre que sexa “viable” e “seguro” para os operarios, co fin de minimizar o impacto económico da crise do coronavirus.
Asime, da que forman parte máis de 600 empresas do metal galego, trasladou que debe haber un “equilibrio” entre a seguridade e garantía sanitaria, e a actividade, para mitigar as consecuencias da actual situación no tecido industrial.
Respecto diso, indicou que, aínda que agora a actividade está ao redor dun 75 por cento, prevese que, a próxima semana, o traballo na automoción sexa do 30 por cento; a construción naval quedará nun 75 por cento; e a aeronáutica, construción e fabricación de estruturas metálicas “probablemente nun 80 por cento”.
“Estas reducións no volume produtivo, especialmente dos fabricantes de primeiro nivel, acabarán tendo tamén un impacto considerable nos provedores de segundo e terceiro nivel, que traballan nestes momentos con practicamente total capacidade, pendentes de posibles incidencias a nivel de transporte de mercadorías ou faltas de subministración que poidan orixinarse nos próximos días, e que ata o momento están a ser só residuais”, aseguraron desde a patronal galega do metal.
Nas actuais circunstancias, Asime pediu que se manteña a actividade onde “sexa viable e, sobre todo, seguro”, porque “un parón total pode facer que a recuperación sexa extremadamente complicada para moitas empresas”, especialmente se o estado de alarma “se alonga no tempo”. “Daranse desequilibrios financeiros irremediables para moitas empresas”, alertou.
PROTECCIÓN DOS TRABALLADORES
Por outra banda, o secretario xeral de Asime, Enrique Mallón, explicou que se empeza a percibir “escaseza” de materiais de protección individual, e que pode haber problemas a partir do 30 de marzo, se non se reciben novas partidas. Por iso, fixo un “chamamento ás administracións públicas para que se esforcen en conseguir” o devandito material de protección.
A patronal do metal sinalou que está “en permanente contacto” coas empresas do sector e asegurou que estas van “mesmo por diante das obrigacións legais e sanitarias” en materia de prevención e garantías sanitarias. “Están a tomarse todas as precaucións e medidas preventivas con rigor”, asegurou.
Asime trasladou estas consideracións despois de que sindicatos como a CIG ou UGT denunciasen a ausencia de medidas de protección en determinadas actividades, como no sector naval, ou a construción. Así mesmo, o sindicato nacionalista informou da paralización de actividade en numerosas empresas auxiliares de automoción tanto da área de Vigo como en Ourense.
