O home de 43 anos de idade hospitalizado con coronavirus no Hospital Álvaro Cunqueiro (HAC) de Vigo permanece estable dentro da gravidade ingresado na UCI.

Así o confirmaron a Europa Press fontes sanitarias, que puntualizaron que non se produciron “cambios significativos” na situación deste paciente desde este luns.

En Galicia, ata a noite do luns, Sanidade confirmou que os afectados por este virus na Comunidade galega ascenden a 18, dos que 13 están na área da Coruña, catro na de Vigo e un na de Ourense. A maiores, quedan algúns casos pendentes do resultado do laboratorio madrileño, entre eles un en Lugo e outro en Pontevedra.

Na área de Vigo, ademais do paciente hospitalizado, os outros tres casos correspóndense coa parella deste, unha muller de 47 anos residente en Moaña (Pontevedra), que viaxara recentemente a Madrid, así como o fillo dela, de 15 anos, e outro familiar.