A dirección da planta de PSA Peugeot Citroën en Vigo informou este xoves do abono da prima variable que, tras coñecerse os resultados financeiros do grupo, quedou fixada nuns 1.770 euros brutos para traballadores a tempo completo (dados de alta todo o ano).
Así o trasladaron fontes da empresa, que explicaron que esta remuneración variable calculouse, por unha banda, tendo en conta a parte variable común no polo ibérico e, por outra, a correspondente como prima local.
Con respecto á primeira parte, fíxase unha porcentaxe de referencia do 6,16 por cento (aplicable ao salario común) e, para calcular o valor individual, réstanse 145 euros a quen teñan integrado no seu complemento a compensación por renuncia ao complemento de xubilación.
En canto á prima local, a empresa explicou que se axustan os obxectivos de calidade e produción, o que permite un grao de realización do 60,17 % e, por tanto, unha prima local do 0,90 %.
Por tanto, tendo en conta eses condicionantes, esta remuneración variable fixouse nun mínimo estimado de 1.770 euros brutos para un traballador a tempo completo en alta todo o ano, o que supón unha mellora dun 11 por cento con respecto ao ano pasado. A prima abonarase en abril (na nómina de marzo) e é, segundo destacou a factoría, “a máis alta dos construtores de automóbiles implantados en España”.
