O Consello de Administración do Consorcio Casco Vello de Vigo (organismo participado nun 90 por cento pola Xunta e nun 10 por cento polo Concello olívico) aprobou este xoves por unanimidade ceder un edificio no Berbés a Turismo de Galicia por 40 anos, para a construción dun albergue de peregrinos.
Así o explicou en rolda de prensa o presidente do Consorcio e delegado territorial do goberno galego, Ignacio López-Chaves, quen destacou que esta iniciativa impulsará aínda máis o Camiño Portugués pola Costa. De feito, lembrou, esta é a ruta xacobea que rexistrou maior incremento no número de peregrinos nos últimos anos.
A parcela que se cederá conta con dúas edificacións conectadas e teñen fachada na Ribeira do Berbés, onde se proxecta aumentar unha planta, e na rúa Peñasco, onde o edificio conservará a altura actual, en consonancia cos inmobles da contorna.
Dado que os inmobles contan con protección, o proxecto de rehabilitación deberá conservar as fachadas orixinais. Así, a ampliación dunha segunda planta realizarase mediante muros de pedra, mantendo a coherencia estética.
O futuro albergue, que estará listo antes do próximo Ano Xacobeo, contará con 90 prazas e será Turismo de Galicia a institución encargada da súa rehabilitación, cun investimento previsto de case un millón de euros. Esta actuación súmase a outras levadas a cabo pola Xunta para impulsar o Camiño Portugués pola Costa e o Camiño Portugués, como o acondicionamento dos itinerarios ou a mellora da sinalización.
CONTRAPARTIDA
Pola súa banda, o alcalde de Vigo, Abel Caballero, recalcou que a posición do Concello foi “determinante” para que a cesión do edificio do Berbés fose aprobada, xa que o Consorcio Casco Vello “funciona por unanimidades”.
A ese respecto, sinalou que o consistorio reclamará ao Consorcio que “aplique as mesmas normas e os mesmos criterios” co goberno municipal e acceda a ceder gratuitamente, por 99 anos, os terreos que se atopan entre a Praza do Rei e a Panificadora.
Trátase de terreos do Consorcio que, como sinalou Caballero, forman parte do conxunto da Panificadora e, por tanto, do proxecto de rehabilitación desa contorna.
