O Concello de Vigo remitiu á Xunta unha proposta de convenio de colaboración para regular a apertura dunha sede do Centro Galego de Arte Contemporánea (CGAC) na cidade olívica, no que se esixe á administración autonómica que dita sede conte cunha sala de exposicións “non menor de 400 metros cadrados” e un orzamento anual de medio millón de euros.

Así o confirmou o alcalde, Abel Caballero, quen insistiu en que a firma dun convenio é a forma de “garantir” que a Xunta cumpre o seu anuncio de abrir esa sede, coas condicións e dotación económica “oportunas”.

Así mesmo, o goberno municipal reclama que o proxecto de barrio creativo anunciado para o Casco Vello, garantir que os 17 locais que serán dedicados a actividade cultural e turística serán alugados por un prazo de polo menos 10 anos.

Caballero comprometeu a cooperación do Concello para tramitar ese proxecto e achegar o 10 por cento do orzamento, cumprindo esas condicións, á vez que estimou que a posta en marcha deses locais terá para a Xunta un custo duns 61.000 euros anuais. “É a metade da subvención que outorga o Concello ao Coruxo ou ao Seis de Nadal, e menos da décima parte do que dedicamos ao museo MARCO”, apostilou o alcalde.