O grupo municipal Marea de Vigo reclamou destinar fondos de partidas non executadas á creación dunha “verdadeira rede de bibliotecas municipais” e non a meras salas de lectura, como existen actualmente na cidade olívica.

Nunha rolda de prensa, o portavoz do grupo, Rubén Pérez, expuxo que os case 3 millóns de euros do concurso de promoción turística en aerolíneas, que quedou deserto, destínense a construír bibliotecas, “no sentido no que as define o propio Ministerio de Cultura”, é dicir, centros con fondo de libros, prensa, e outra documentación, e non meras salas de lectura.

A ese respecto, o edil de Marea lamentou que unha cidade como Vigo, que pretende superar a barreira dos 300.000 habitantes, só dispón dunha biblioteca municipal (a biblioteca Xosé Neira Vilas), e algunhas salas de lectura, como a da aula da UNED, ou como a de Navia, que “nin sequera funciona”.