Un Traballo de Fin de Grao (TFG) analizou o aproveitamento de resina dos piñeirais galegos, cuxo uso principal é o madeireiro, como “bioproducto sustentable e renovable de interese para a industria nun contexto de graves problemas ambientais e de necesidade de revalorizar o medio rural”.
Segundo informa o Centro Superior de Investigacións Científicas (CSIC) nun comunicado, o estudo, realizado no marco dunha axuda da Xunta para o proxecto de innovación ‘Novas tecnoloxías aplicadas ao aproveitamento resineiro de Galicia’, destacou que esta actividade contribúe á “prevención de incendios forestais ou a detección temperá de enfermidades e pragas” silvestres.
Así mesmo, o traballo constatou que suporía “a creación de postos de traballo directos, a fixación de poboación no rural e unha renda económica complementaria aos propietarios”.
O proxecto foi presentado por Ricardo Alberte Quiroga García na Escola de Enxeñaría Forestal da Universidade de Vigo e dirixiuno o investigador da Misión Biolóxica de Galicia, Rafael Zas, e a profesora da USC, Margarita Lema Márquez.
POTENCIAL PRODUTIVO RESINEIRO EN GALICIA
Tras a análise de máis de duascentas hectáreas de montes da provincia de Pontevedra, comprobouse que Galicia é un territorio cun “enorme potencial produtivo” de resina pero con “escasa tradición no sector”.
Así mesmo, o científico Rafael Zas valorou que esta produción “non debe infravalorarse” pois “noutros lugares de España é considerada unha actividade estratéxica”.
Desta forma, o proxecto incluíu un método “innovador, sinxelo e rápido” denominado “microrresinación” para estimar “a produtividade de resina dos piñeirais” que, segundo informou o CSIC en base aos resultados do estudo, é maior nas árbores de máis idade (30-40 anos). “Producen tres veces máis resina que os máis novos (10-20 anos)”, sinalou Ricardo Quiroga.
A este respecto, o autor do TFG valorou que esta nova metodoloxía é “unha ferramenta que pode ser de gran utilidade para unha planificación global deste aproveitamento en todo o territorio galego”.
