O Deportivo e o Celta, máximos rivais no céspede, uníronse nunha iniciativa para axudar a unha nena con xordeira que perdeu uns implantes cocleares na Coruña.
O club coruñés pediu aos seus afeccionados, a través das redes sociais, a colaboración para recadar o diñeiro suficiente (16.000 euros) para repoñer os implantes da pequena Olalla.
O Celta retuiteou a mensaxe do Deportivo e animou aos celtistas para axudar nesta iniciativa porque “a solidariedade non entende de cores”.
Tamén contribuíron á campaña outros clubs como o Leyma Básquet Coruña, que dispuxo a súa hucha solidaria e a recadación das súas rifas para ese fin no seu partido da LEB Oro ante o Ourense.
Os implantes cocleares son dispositivos electrónicos médicos deseñados para persoas con perda auditiva grave ou profunda e, a diferenza dos audífonos que amplifican o son, transforman os sons en sinais eléctricos que envían directamente ao nervio auditivo e de aí ao cerebro, evitando as zonas danadas do oído.
