A Policía Nacional detivo en Vigo a dous mozos de 18 e 20 anos residentes na cidade por, supostamente, fracturar a mandíbula a un home e romperlle varios dentes para roubarlle, así como por golpear o seu amigo cunha botella.
Segundo trasladaron fontes policiais, os feitos tiveron lugar na madrugada do pasado 30 de novembro, cando os mozos observaron como o home sacaba a súa carteira para pagar unhas consumicións nun local da rúa Pontevedra. Tras decatarse de que o miraban con atención, o home gardou a carteira nun peto do seu abrigo e abandonou o establecemento para reunirse cuns amigos noutro local próximo.
Nese momento, un dos mozos interceptouno, mentres un amigo do home que se achegou para preguntar que ocorría recibiu un golpe na cabeza cunha botella, polo que tivo que ser trasladado ao hospital. Pola súa banda, os dous mozos fuxiron do lugar á carreira.
Posteriormente, o home entrou no local para avisar aos seus amigos do que ocorrera e, pouco despois, abandonou o lugar coa súa parella. Mentres ambos camiñaban pola avenida García Barbón atopáronse cos dous mozos, que comezaron a golpealo ata derrubalo e subtraéronlle a carteira. Como consecuencia, este home tivo que ser trasladado a un hospital, onde foi intervido cirurxicamente.
Ademais, os policías tomaron declaración a varias testemuñas e iniciaron investigacións para poder identificar os agresores. Finalmente, este mércores pola tarde, localizáronos e detivéronos cando camiñaban pola contorna da rúa Camelias.
Tras trasladalos a comisaría, tomáronlles declaración e comprobaron que carecían de antecedentes policiais. Así mesmo, estes dous mozos e todo o actuado pasaron a disposición do xulgado de Instrución de Vigo en funcións de garda.
