Cada día que pasa aumenta o malestar e a crispación do persoal do Álvaro Cunqueiro de Vigo, cun modelo de xestión privada polémico desde o primeiro día. Agora as que están en pé de guerra son as Técnicas/os en Coidados Auxiliares de Enfermaría (TCAE), que iniciaron peches e mobilizacións contra a decisión da Xerencia da EOXI de imporñerlles o transporte das bolsas da roupa sucia unha vez que a empresa concesionaria da limpeza deixou de facelo, pero hoxe sumáronse á súa loita traballadores/as de todas as categorías laborais do centro sanitario: enfermeiros/as, médicos/as, celadores/as, limpadores/as, etc.
Na mañá deste xoves, coincidindo coa visita do conselleiro de Sanidade ao hospital, foi o propio xerente da EOXI, Félix, Ruibal, o que retirou varios cartaces coas súas propias mans. Ruibal foi ao día siguiente o branco principal das protestas, e o persoal esixiu a berros a súa dimisión e concentrouse varios minutos ás portas do seu despacho.
E é que este mediodía, coincidindo co remate do peche, a Comisión de Centro chamou a todos/as os traballadores/as a unha mobilización na entrada principal “na defensa da nosa dignidade como traballadores/as, contra o seu modelo de xestión, na defensa dos nosos postos de traballo e por unha sanidade pública e de calidade”.
A convocatoria tivo un seguimento moi importante, até o punto de que decidiron saír en manifestación até a rotonda da estrada Clara Campoamor, onde interromperon o tráfico por un breve espazo de tempo. A continuación foi cando se dirixiron ao despacho da Xerencia para reclamar a berros a dimisión do seu responsábel.
