O concelleiro do BNG no Concello de Vigo, Xabier Pérez Igrexas, denunciou este luns a “política de desertización cultural” do goberno de Abel Caballero, e o seu “nulo respecto” por “todo o que teña que ver coa cultura galega”, ao constatar que, tras meses pechado, non se coñece cando nin onde volverá porse en marcha o Centro de Artesanía Tradicional municipal (CAT).

Así o trasladou o edil nacionalista, quen cuestionou o goberno local ao redor do CAT, un centro que era “unha clara aposta” por recuperar e difundir a actividade de artesanía tradicional e que “leva pechado desde xaneiro deste ano”.

Segundo incidiu Pérez Igrexas, a concellaría de Cultura do Concello de Vigo “non debe baixar a persiana” de centros como este, senón “redobrar esforzos” e facer “unha aposta decidida” por impulsar a cultura e, en concreto, a cultura galega.

Ao seu xuízo, o peche do CAT, así como a cesión do Centro Galego de Fotografía para que a Deputación de Pontevedra instale a súa nova sede na cidade, son exemplos “claros” da “política de desertización cultural” que practica o goberno local, con Abel Caballero á fronte.

Por iso, urxiu “unha rectificación” desta “política cultural suicida” que leva a cidade de Vigo á “irrelevancia” neste ámbito, cando debería ser un “motor cultural” de Galicia.