O ministerio de Fomento aprobou provisionalmente o proxecto de remodelación da Avenida de Madrid, un dos principais viarios de entrada na cidade de Vigo (desde o sur de Galicia e desde Portugal), e que contará cun investimento de 13,4 millóns de euros.

Así o trasladaron este luns fontes do Ministerio, que precisaron que o proxecto será sometido en próximas semanas a información pública. A partir de aí, unha vez resoltas as alegacións, aprobarase o proxecto definitivo e licitaranse e adxudicarán as obras.

Precisamente, será o Concello de Vigo (que achega un terzo do financiamento da obra) a administración encargada desa licitación e de coordinar e facer o seguimento dos traballos, segundo sinalou o alcalde, Abel Caballero.

Esta remodelación é froito dun convenio asinado entre o consistorio olívico e o Ministerio de Fomento en 2016 (sendo Ana Pastor ministra). O acordo foi posteriormente modificado, “cando chegou Pedro Sánchez ao Goberno”, para ampliar o investimento de 9 a 13,4 millóns.

“Queremos que sexa unha gran avenida, non unha simple estrada de entrada á cidade”, proclamou o rexedor, quen confirmou que a ‘humanización’ incluirá a instalación de esculturas e novo mobiliario urbano.