O conselleiro de Economía, Emprego e Industria, Francisco Conde, asegurou que a Xunta “estará na solución” que se expoña para o estaleiro vigués Hijos de J. Barreras, pero sinalou que, para iso, resulta preciso coñecer a súa situación e como se xestionará para que sexa viable.
Preguntado polos medios no marco dun acto en Vigo, o conselleiro constatou que a petición da disolución xudicial da sociedade permitirá dispor de “tempo” para atopar unha solución “razoable” ata o vencemento do prazo para que a empresa entre en concurso de acredores, que terá lugar en febreiro.
Con todo, volveu a remarcar que a prioridade dos accionistas e demais partes debe pasar por dar unha resposta que garanta o futuro do estaleiro. Deste xeito, instou os armadores a concretar a viabilidade de Barreras e a detallar se poden asumir a carga de traballo contratada.
Conde sinalou así que, unha vez que os accionistas presenten unha solución para viabilizar e xestionar a empresa, o Goberno galego reunirase cos armadores para atopar unha solución dada a situación preconcursal na que se atopa.
Ademais, advertiu de novo de que abordar un proxecto concreto “non parece razoable se non garante a viabilidade do estaleiro” e matizou que iso non levaría unha solución para os empregados.
Nese sentido, insistiu en que é necesario coñecer se haberá cambios no accionariado e como “quedará” o mesmo –a semana pasada transcendeu que Ritz Carlton chegara a un acordo coa filial da petroleira mexicana Pemex PMI e o grupo Albacora, que suman o 75 por cento do capital, para controlar o estaleiro–.
Francisco Conde reiterou tamén a vontade de colaboración da Xunta, que traballa con CESCE e Pymar, e lembrou a liña de préstamos posta a disposición da industria auxiliar polo Executivo autonómico.
