A Xunta destinará ao redor de 4 millóns de euros a concellos e entidades da área de Vigo para levar a cabo 14 iniciativas que permitirán formar a 1.400 persoas sen emprego. Segundo recolleu o Goberno galego nun comunicado, a Xunta resolveu a convocatoria de axudas dos programas integrados de emprego que buscan mellorar o acceso ao mercado laboral dos participantes.

Así, nun prazo máximo de dous meses seleccionarase ás persoas que formarán parte do proxecto, no que se priorizará a participación de colectivos con risco de exclusión social e maiores de 45 anos, entre outros. En concreto, os concellos beneficiarios do programa foron Mos, Redondela, Salceda de Caselas, Moaña e Vigo, aos que se destinan case 1,2 millóns de euros.

Ademais, consignáronse case 2,7 millóns de euros para as seguintes entidades: a Asociación de Empresarios de Mos, a Fundación Nortempo, a Asociación Agarimo, a Confederación Provincial de Empresarios de Pontevedra, a Fundación CIP, a Federación Provincial de Empresarios de Hostalaría de Pontevedra, a Asociación de Industriais Metalúrxicos de Galicia, a Asociación de Empresarios A Pasaxe e a Asociación de Comerciantes e Profesionais Zona Príncipe. Ademais, Acción Laboral e a Asociación de Empresarios de Redondela desenvolverán actuacións destinadas só a mulleres.

A nivel autonómico, executaranse un total de 22 programas en concellos, aos que se destinarán 5 millóns de euros, e 21 en entidades sen ánimo de lucro, para as que se consignaron 4,9 millóns de euros.