O conselleiro de Economía, Emprego e Industria da Xunta de Galicia, Francisco Conde, expresou este mércores a súa esperanza de que “o resultado” da auditoría que se está realizando no estaleiro vigués Hijos de J. Barreras permita “identificar solucións” e tomar medidas para reactivar o traballo.
En declaracións aos medios, Conde subliñou que, mentres se elabora ese informe, a Xunta segue “traballando conxuntamente co ministerio de Industria, con CESCE e con Pymar” na procura de solucións para retomar a actividade no estaleiro (que está en preconcurso de acredores) e afrontar toda a carga de traballo pendente nas bancadas.
O conselleiro indicou que o goberno galego trasladou ao Consello de Administración do estaleiro (liderado pola petroleira mexicana Pemex, a través da súa filial PMI, co 51 por cento das accións) “a importancia de tomar medidas inmediatas”, e lembrou que esas medidas deben servir tamén para garantir a “viabilidade a longo prazo” de Barreras.
Segundo lembrou, a Xunta “xa actuou” ao habilitar unha liña de préstamos para as industrias auxiliares afectadas pola crise do estaleiro, e “estará na solución” que garanta a viabilidade de todo o traballo pendente e futuro.
Así as cousas, non parece que o conflito aberto no seo do estaleiro vaia ter un final próximo. Os principais accionistas seguen sen porse de acordo acerca dunha posible venda dos seus títulos, pese ao interese mostrado por unha banda, polo armador Ritz Cartlon (a través dun fondo), por outro, polo presidente cesado e accionista José García Costas e, en terceiro lugar, polas propias industrias auxiliares acredoras, que constituíron unha sociedade para tomar o control de Barreras.
Mentres, os prazos seguen correndo e, aínda que a empresa está en situación de preconcurso (o prazo para entrar en concurso esgótase a principios de febreiro), o desequilibrio patrimonial de Barreras púxoa nunha situación delicada.
Así, segundo a Lei de Sociedades de Capital, se unha empresa ten uns fondos inferiores á metade do seu capital social, incorrería en causa de disolución, para o que se dá un prazo de dous meses. Ese prazo conclúe o próximo 26 de novembro e, se quere evitar a entrada en concurso, Barreras debe corrixir esa situación (a ampliación de capital podería ser unha opción).
