O Concello de Vigo porá en marcha o próximo 9 de decembro unha nova liña de Vitrasa que unirá Praza América coa residencia de maiores Santa Marta, situada no barrio de Alcabre. Sinalouno este mércores nunha rolda de prensa o alcalde, Abel Caballero. Asegurou que esta conexión chega despois da petición realizada polas persoas maiores que residen no centro.

O percorrido da nova liña de Vitrasa partirá de Praza América e percorrerá a avenida de Castelao, Tomás Paredes, a avenida Atlántida, Camiño Viña Grande, Camiño Sobreira e Camiño Freixeiro con horario de saída desde Santa Marta ás 10:15 horas, 16:45 horas e 19:40 horas e saídas desde Praza América ás 12:20 horas, 16:25 horas e 19:20 horas.

Caballero indicou que para a posta en marcha desta liña foron necesarias modificacións en diferentes viarias de Alcabre para permitir o acceso dos autobuses.