Marea de Vigo presentou 26 emendas ao regulamento de transporte do Concello olívico, por considerar que o proxecto presentado polo goberno local “consagra a explotación privada do servizo”.

Así o trasladou o portavoz do grupo, Rubén Pérez, quen lamentou que o documento xa contempla os dereitos e deberes da empresa concesionaria, de modo que dá por feito que o servizo vai ser prestado por unha empresa privada “si ou si”, o que dificulta un eventual camiño cara á remunicipalización do servizo.

Marea de Vigo xa presentou, no período de consulta previa, unha proposta completa de regulamento, pero “só foi tomada en conta parcialmente”, polo que agora, unha vez resoltas as contestacións a particulares e colectivos que presentaron alegacións, traslada as propostas que non foron atendidas en forma de emendas.

Este grupo defendeu a súa “proposta construtiva”, que regula diferentes aspectos do transporte, como o ámbito de aplicación, os dereitos e deberes dos usuarios e empregados, o establecemento de paradas, os distintos tipos de billetes, ou a posta en marcha dunha Oficina de Atención á Cidadanía. Tamén inclúe conceptos novos, como o abono para desempregados.