Os Bombeiros de Vigo cumpren este xoves tres meses de folga indefinida pola “alarmante falta de persoal” sen que se convocasen as oposicións anunciadas polo alcalde, Abel Caballero, e sen que se albisque outra saída que a xudicial, dado que o Concello pechou toda interlocución co comité de folga.

De feito a semana pasada, a CIG interpuxo outras dúas denuncias ante o Contencioso Administrativo de Vigo, unha para denunciar un defecto de forma no decreto de servizos mínimos que entenden que o invalida, e outra para pedir que se manteña activa preventivamente a sentenza en primeira instancia contra o Concello, que este recorreu.

A CIG pasará mañá de novo polos Xulgados de Vigo, onde ás 9:00 horas se dirimirá o xuízo pola demanda que presentaron os opositores contra a convocatoria de oposicións de 2016, despois de que o Concello desestimase en febreiro o recurso de alzada presentado por 57 candidatos.

Todo un caldo de cultivo que fai difícil o entendemento e que mantén aos Bombeiros de Vigo nunha situación que lles “ten moi preocupados”, dixo a Efe Miguel Uclés, delegado da CIG.

“Estamos en alerta laranxa e coas incidencias que está a haber creo que corresponde saber aos cidadáns de Vigo a precariedade absoluta que hai no servizo nestes momentos: falta de persoal, incumprindo os mínimos e cunha carga de traballo que xerou nos bombeiros unha fatiga crónica“, engadiu.

Uclés lamenta que haxa “interlocución cero” co Concello, e sinala directamente a Elena Espinosa, concelleira de Seguridade, Empresa, Economía e Organización Municipal, á que atribúe “unha soberbia que un cargo político non se pode permitir”.

“Máis, cando aquí o que estamos a reclamar é un mellor servizo para a cidadanía, aquí non hai ningún tipo de esixencia económica nin mellora laboral para os traballadores. É unha folga histórica porque non podemos dar o servizo que queremos e que piden e merecen os cidadáns”, subliña Uclés.

Os bombeiros insisten en que teñen “unha carga de traballo escravista” e temen que se produza unha desgraza.

Subliñan que está inactivo o servizo de salvamento e rescate acuático porque leva meses sen facer prácticas por falta de persoal.

Namentres, “por responsabilidade coa cidadanía”, aos bombeiros non lles queda outra que agardar as sentenzas que emanen dos xulgados, o que lles dá certa esperanza.

“Están a darnos a razón en todas as denuncias que poñemos, tanto en Inspección de Traballo como nos Xulgados e maxistratura”, subliña Uclés.

Tamén, que se active canto antes unha comisión de servizos en marcha que proporcionaría catro condutores e quince bombeiros chegados de fóra durante un máximo de dous anos, e que o Concello se decida a convocar as oposicións que anunciou, as cales permitirían incorporar a metade dos efectivos que o corpo agora mesmo necesita.

“Tiñan que estar a principios de setembro, estamos a finais de novembro e aínda non se publicaron as bases das oposicións de 2017, 2018 e 2019”, lamenta Uclés.