O goberno municipal de Vigo ofreceu este venres axuda a unha parella á que van a desafiuzar proximamente, para que poida pagar un aluguer, “cando consigan” unha nova vivenda, e lembrou que o Concello destina máis de 2,5 millóns de euros ao ano a “evitar desafiuzamentos”, a pesar de que a política de vivenda é “competencia da Xunta”.
Así o trasladou a concelleira de Políticas Sociais do goberno vigués, Yolanda Aguiar, en resposta á concentración convocada pola Oficina de Dereitos Sociais e por outros colectivos, para reclamar “vivenda digna” para familias vulnerables na cidade.
Aguiar sinalou que a familia á que fixeron alusión nese acto, unha parella con dúas fillas menores que non pode facer fronte ao aluguer e que subsiste coa Risga, “está a ser atendida polos servizos sociais” do Concello, e que ela mesma lles informou “do alcance” das axudas ás que poden optar.
A edila socialista sinalou que o Concello lles ofreceu axuda para pagar o aluguer, unha vez “que consigan outra vivenda” e engadiu que esta familia foi derivada ao programa Reconduce da Xunta, pero non foi posible atoparlles unha solución porque o propio Goberno galego “admite que non ten vivendas en Vigo” para ese reacollo.
“Os colectivos que estiveron reivindicando vivenda digna saben que a administración competente é a Xunta, e que o Concello ten importantes axudas antidesafiuzamentos”, recalcou e apuntou que, de feito, foron os servizos municipais os que axudaron a esta familiar a “gañar tempo” e atrasar o lanzamento.
“Pero o certo é que en Vigo existe un problema estrutural de carencia de vivenda digna e a Xunta é a administración que debe pór unha solución sobre a mesa”, sentenciou, e prometeu que, unha vez que se produza o desaloxo, o Concello cooperará nunha solución de “interinidade” mentres que a familia non atope outra vivenda.
Protesta en Vigo para evitar o desafiuzamento dunha parella con dúas fillas menores
