A Fundación Provincial Banco de Alimentos de Vigo necesita aínda da solidariedade dunhas 1.200 persoas de toda Pontevedra que queiran ser voluntarias os próximos 22 e 23 de novembro, as dúas xornadas nas que se desenvolverá a Gran Recollida deste ano.
Así, nun comunicado, Banco de Alimentos sinalou que desde que se presentou ante os medios a Gran Recollida de 2019, xa foron adxudicados uns 700 voluntarios, pero séguense necesitando mans para poder levar a cabo esta acción solidaria.
En total, dos case 2.000 voluntarios necesarios para toda a provincia, 1.200 serán para cubrir Vigo e a súa área de influencia, 500 para Pontevedra e a súa comarca, 250 para o Val Miñor e 50 para o Baixo Miño.
Para ser voluntario do Banco de Alimentos hai que chamar ao 986263022 ou cubrir un formulario colgado na web.
A Gran Recollida de 2019 estará presente en máis de 150 superficies comerciais de Vigo e Pontevedra, así como das comarcas do Morrazo, Val Miñor, Baixo Miño, O Salnés e Deza. O ano pasado recolléronse 330.000 quilos de comida, e o obxectivo do Banco de Alimentos é igualar, polo menos, dita cifra.
Doutra banda, o próximo 15 de novembro a ONG desvelará quen será o substituto ou a substituta do actor e humorista David Amor, padriño da última Gran Recollida de Alimentos.
