O alcalde de Vigo, Abel Caballero, criticou este martes a ausencia da Xunta na crise do estaleiro Fillos de J. Barreras, e lembrou que foi Feijóo “quen trouxo aos executivos de PEMEX”, aínda que agora “só fala de industrias do norte de Galicia”.
En declaracións aos medios, o rexedor olívico expresou a súa preocupación pola situación do estaleiro, que está en preconcurso de acredores, e polas consecuencias que esa crise está a ter na industria auxiliar. “E a nosa pregunta é onde está a Xunta?”, cuestionou.
O primeiro edil de Vigo constatou que o presidente do goberno galego fala “de industria do norte de Galicia” e, con todo, “non lle escoitan” referirse ao “maior problema industrial que hai agora en Galicia”, con mil empregos e a marca do sector naval de Vigo en xogo.
Segundo Abel Caballero, o presidente da Xunta “está obrigado a porse á fronte da situación e resolvela”, e pediulle que o faga “rapidito”, á vez que lle ofreceu a “cooperación leal” do Concello.
“Quen trouxo aos executivos de PEMEX para que se fixesen cargo de Barreras foi Feijóo, quen se sacaba as fotos era Feijóo, e a competencia é da Xunta“, recalcou o alcalde.
Así, censurou que “estivo para as fotos, pero agora non está“, e non só non fala do estaleiro, senón que tampouco explicou aos traballadores como o goberno galego vai resolver a situación.
