Dende ANPE (Sindicato Independente do Profesorado) congratúlanse “ante o claro posicionamento do alcalde de Vigo, esixindo, para poder autorizar a ampliación de Navia, entre outras medidas, como o soterramento da VG-20, que se incorpore ó proxecto urbanístico impulsado pola Xunta un instituto público, e comprometéndose a ceder terreos municipais para ese uso”.
O ANPE opuxérase ao proxecto de zonificación escolar de Vigo que fora trasladado pola Xefatura Territorial en Pontevedra da Consellería de Educación. Unha das causas desta oposición era o non contemplarse en dito proxecto a implantación dun Instituto de Ensino Secundario na zona de Navia, deixando sen cobertura de servizos educativos públicos de ensino secundario no barrio a unha poboación de quince mil persoas, e cunha pirámide poblacional inédita en Galicia e mesmo en todo o Estado.
Unha vez comunicada a súa desconformidade ó Xefe Territorial de Educación, e ante a resposta deste, instando a ANPE a xestionar ante o alcalde de Vigo a posta a disposición da Consellería de Educación de terreos para dotación educativa en Navia, este sindicato constatou “a lamentable falta de comunicación entre as administracións autonómica e local, polo que a nosa organización, primando o interese xeral e superior educativo, non tivo ningún reparo en recoller o guante, e transmitiulle ó alcalde a citada demanda, realizando así un labor que debería corresponder á Consellería de Educación, pero que nós, na nosa aposta decidida en pro do ensino público, non dubidamos en asumir”.
Agora, recalcan, “a pelota volve ó tellado da administración autonómica”, que “queda sen argumentos para opoñerse á creación dun instituto en Navia“. A Xunta xa recibira máis de 2.000 alegacións en defensa do mantemento dos espazos verdes do barrio e da creación de servizos.
