O alcalde de Vigo, Abel Caballero, lembrou este martes, cando se cumpren dous anos dos incendios que arrasaron gran parte dos montes da cidade, que o lume foi extinguido por medios da propia cidade, “sen axuda de ninguén” e que “a Xunta non apoiou” ese labor de extinción.

Nunha rolda de prensa celebrada despois dun acto de plantación simbólica de árbores nun colexio de Valadores, o rexedor subliñou que o incendio se declarou á primeira hora da tarde do 15 de outubro de 2017 e que, sobre as 5,00 horas da madrugada, “xa estaba extinguido”. “Fixémolo Vigo sós, sen a axuda de ninguén, e do presidente da Xunta o único que conseguín é que me dixese que non tiña medios”, rememorou Caballero.

A ese respecto, subliñou que, cando os medios externos xa estaban en disposición de cooperar, as chamas foran xa extinguidas por efectivos de bombeiros, Policía Local, Policía Nacional, Protección Civil, Garda Civil e miles de voluntarios. “É a primeira lección que sacamos, non temos que esperar nada da Xunta que, naquel momento, non estaba preparada para dar axuda”, reiterou.

“Gustaríame que a Xunta fixese autocrítica, pero pasaron 2 anos e non mellorou nada. A Xunta está na mesma situación, se hoxe repetísense os incendios, teriamos que volver extinguilos cos nosos medios”, proclamou o alcalde olívico. A partir de aí, sinalou, o goberno local “si que tomou decisións” e, segundo presumiu, desde esas datas ata o final deste ano plantaría unhas 3.000 árbores.

Así mesmo, engadiu, o Concello aprobou o plan de prevención e defensa contra incendios (que delimita a rede de franxas secundarias e as zonas de influencia forestal). De feito, a próxima semana iniciaranse as inspeccións aéreas vía satélite, que permitirán comprobar a limpeza das leiras.

Ademais diso, Abel Caballero afirmou que o goberno está “a redactar” o proxecto do chamado ‘Anel Verde’, unha franxa de protección duns 50 quilómetros de lonxitude e que separa zonas forestais de zonas urbanas.