O BNG acusou á Xunta de “capitalizar” Povisa para que a súa venda “sexa mellor” e defendeu que hai “mecanismos legais” para reverter un paso deste tipo. De feito, avanzou iniciativas na Cámara, onde preguntará ao Goberno galego pola situación e proporá que se faga a declaración de interese público do hospital.
Así o trasladou, en declaracións aos medios, a deputada do BNG Montse Prado, quen, acompañada do concelleiro Xabier Pérez Igrexas, mantivo unha reunión este mércores con membros do comité de empresa de Povisa.
“No BNG saltaron todas as alarmas ao coñecer a venda; reunímonos co comité de empresa, que nos traslada a súa máxima preocupación”, indicou a parlamentaria, quen acusou á Xunta de actuar para “capitalizar” Povisa –cun concerto polo que ingresa fondos públicos– co fin de que tivese “unha venda moito mellor”.
“Parécenos un escándalo”, engadiu, antes de incidir en que os populares agora “miran cara a outro lado” dando a entender que se está ante “unha transacción entre particulares” e “obviando que incumbe a unha parte importantísima da área sanitaria de Vigo”.
“TODA A CARNE NO ASADOR”
O BNG, avanzou, porá “toda a carne no asador” para que se reverta unha situación da que o PPdeG é “impulsor, cómplice e consentidor”. Para iso, defendeu que hai “mecanismos legais” e indicou que o Bloque exporá a declaración de interese público do hospital.
“Non nos fiamos o máis mínimo de que a Xunta diga que estará vixiante cando non o estiveron ata agora”, apostilou.