A Garda Civil investiga penalmente a un veciño do municipio de Cangas como presunto autor dun delito de incendio forestal, ocasionado supostamente polos restos dunha grellada. Segundo informou o corpo, os feitos ocorreron a principios deste mes, cando se declarou un incendio forestal na Costa da Vea, unha área catalogada como espazo natural.
Os medios de extinción, tanto aéreos como terrestres, conseguiron atallar do incendio poucas horas despois, polo que afectou a 4,5 hectáreas de superficie rasa. Dous días máis tarde, con todo, reproduciuse o incendio en dous puntos da mesma zona, afectando nesta ocasión a preto de dúas hectáreas.
As pescudas realizadas por un Equipo Multidisciplinar de Investigación de Incendios Forestais da Comandancia da Garda Civil de Pontevedra, en colaboración coa Brigada de Investigación de Incendios Forestais da Xunta, permitiron localizar os restos das brasas dunha grellada como posible causa do lume.
Esta acción “obxectivamente neglixente”, apunta a Garda Civil, “convértese en temeraria tendo en conta as condicións meteorolóxicas do día” do incendio, con fortes refachos de vento e índice de risco “extremo”.
Os axentes procederon á identificación da persoa que supostamente abandonou as brasas da grellada na masa forestal afectada e procedeuse á súa notificación como presunto autor dun delito de incendio forestal por imprudencia grave.
