A Sección Quinta da Audiencia Provincial de Pontevedra, con sede en Vigo, condenou a unha muller, L.B.S., a seis anos de prisión por provocar un incendio nunha vivenda da cidade olívica o 14 de xuño de 2018, que causou danos na mesma e en zonas comúns do edificio, ademais de pór en risco a integridade dos seus veciños.
A vista oral, fixada para este mércores, non tivo lugar debido a que se alcanzou un acordo de conformidade entre as partes, a Fiscalía pedía inicialmente 10 anos de prisión. Así, tras recoñecerse como responsable dun delito de incendio con grave perigo para a vida e a integridade física das persoas, a condenada verá descontado da pena o período que pasou no cárcere desde que ingresou de modo preventivo, en xuño de 2018. Ademais, decidiuse non repatriar á condenada ao seu país de orixe, Brasil, polo que continuará o cumprimento da condena en España.
Na resolución xudicial aplicouse a circunstancia atenuante de intoxicación debido a que a procesada presentaba un consumo prexudicial de alcol e de cocaína no momento dos feitos. A muller tamén deberá indemnizar ás dúas aseguradoras que asumiron os custos derivados dos danos en zonas comúns do edificio e na vivenda na que ela residía, da que non era propietaria. Deste xeito, deberá abonar 21.800 e 25.600 euros a estas entidades.
Así mesmo, indemnizará a un dos residentes no edificio, M.D.X., en máis de 1.300 euros polos danos causados no seu domicilio polo lume e pagará outros 38 euros a outra veciña, L.P.C., en concepto de gastos de limpeza.
FEITOS
Os feitos tiveron lugar despois de que esta muller amontoase varios trapos e obxectos e trapos no chan, na cociña e xunto á porta de entrada á vivenda na que residía e lles prendera lume para, a continuación, abandonar a vivenda.
Como consecuencia, as chamas causaron danos neste domicilio e en zonas comúns do edificio, mentres que o fume afectou tamén a varios pisos veciños. A actuación dos bombeiros e a Policía Local, que extinguiron o lume e desaloxaron aos residentes, permitiu que non houbese danos persoais.
