Médicos de Atención Primaria da área sanitaria de Vigo aprobaron por maioría ir á folga os días 7 e 8 de novembro para reclamar unha solución que dea resposta á sobrecarga asistencial e ás xubilacións masivas que terán lugar os próximos anos.

Os profesionais tomaron esta decisión, que se trasladará a representantes das demais áreas sanitarias galegas o próximo 3 de outubro, durante unha asemblea celebrada este martes en Vigo. Mentres, rexeitouse levar a cabo unha folga indefinida.

Ademais, os facultativos aprobaron celebrar o próximo 26 de outubro unha manifestación en Santiago á que se convidará a participar a toda a cidadanía. Así mesmo, acordaron realizar concentracións ante os distintos centros de saúde durante todos os xoves de outubro.