A Xunta de Galicia recoñeceu este mércores a situación de “enorme dificultade” que atravesa o estaleiro vigués Vulcano, aínda que ofreceu o seu apoio se xorde “algunha xanela de oportunidade”.

Así o trasladou o conselleiro de Economía, Emprego e Industria, Francisco Conde, a preguntas dos medios durante unha visita no Instituto Español de Oceanografía de Vigo. Conde lembrou que, actualmente, a situación do centenario estaleiro está xudicializada, tras a presentación do concurso, e é necesario “esperar” a que o administrador concursal “concrete o plan de liquidación”.

A partir de aí, sinalou, poderíanse identificar posibles investidores “interesados en dar continuidade” á actividade industrial de Vulcano, pero todo pasa “necesariamente” polas decisións do administrador concursal e, en última instancia, do xulgado mercantil.

En todo caso, o conselleiro lembrou que o goberno galego apoiou á empresa ao longo dos últimos anos, e de forma “especialmente intensa” na última etapa, para que puidese finalizar e entregar o ferry de Transmediterránea.

“A Xunta estará xunto calquera solución que dea viabilidade, pero tamén hai que ser moi realistas, e recoñecer a situación de enorme dificultade”, apuntou Francisco Conde, e pediu “esperar e identificar se realmente hai algunha  oportunidade e, se se atopa, a Xunta estará para dar solucións”.

VISITA AO OCEANOGRÁFICO

Francisco Conde fixo estas declaracións durante unha visita ao Instituto Español de Oceanografía (IEO) en Vigo, na que destacou a achega deste centro de investigación á innovación en materia pesqueira.

Así, o conselleiro puxo en valor que o IEO, que conta con apoio económico da Xunta, a través dos contratos-programa, traballa nestes momentos nuns 80 proxectos, dos que a gran maioría están financiados con fondos externos. O titular de Economía, Emprego e Industria da Xunta eloxiou o papel do IEO na protección ambiental e na competitividade das actividades de pesca e acuicultura.