A Plataforma de Afectados pola explosión dun almacén pirotécnico clandestino na parroquia de Paramos, en Tui (Pontevedra), en maio de 2018, volveu a reclamar este luns que se axilicen os trámites para concederlles as licenzas e poder reconstruír as súas casas, á vez que expresaron o seu “malestar” polas “trabas” e “exceso de celo” que, ao seu xuízo, se lles pon desde o servizo municipal de urbanismo.
A través dun comunicado, esta plataforma insistiu en que os veciños da chamada ‘zona cero’ da explosión están a atopar “dificultades” nas oficinas de urbanismo do Concello de Tui.
Así, apuntaron que os seus expedientes se revisan “co máximo detalle”, ou se lles piden documentos “que non son necesarios”, e alertaron de que necesitan unha tramitación áxil dos permisos para reconstruír as súas casas, porque en maio do ano que vén quedan “sen cobertura” do pago dos alugueres das vivendas onde están reacollidos.
A Plataforma aceptou que se queira dar “máxima legalidade” á actuación, pero lembrou que están “ante un caso excepcional que require medidas excepcionais” e que a Lei do Solo de Galicia “foi modificada hai uns meses especificamente para zonas declaradas catastróficas”, co fin de dar “encaixe legal” a vivendas que estaban fóra de ordenación.
Finalmente, e por outra banda, o colectivo trasladou a súa “inquietude” por unha proposta de corrección das bases que regulan as axudas dadas polo Concello. Segundo apuntaron, exponse a posibilidade de reducir de 180 a 120 metros cadrados a superficie máxima das vivendas obxecto de axuda.
A este respecto, advertiron de que o cambio sería “grave”, e viría modificar unhas bases que foron revisadas polos técnicos municipais, “os mesmos que piden cambiala”, que xa foi publicada e “ten plena validez”.
