A Fiscalía pide penas que suman 35 anos de cárcere para 12 acusados de participar nunha liorta no mercadillo de Cangas, entre os que están Sinaí Giménez e varios dos seus familiares, así como membros do grupo coñecido como ‘xitanos zamoranos’, e que serán xulgados na sala do Penal 2 de Pontevedra, entre o 1 e o 5 de xullo.
O ministerio público formulou escrito de acusación contra 12 feirantes xitanos (sete deles do grupo coñecido como ‘zamoranos’, e outros cinco dos ‘Morones’), aos que considera autores de diversos delitos de lesións, por unha pelexa que tivo lugar na mañá do 16 de outubro de 2015.
Segundo o escrito de acusación pública, o acusado Sinaí G.J. iniciou unha discusión co acusado Enrique L.S. porque este instalara o seu posto de venda no mercadillo de Cangas ocupando dous metros máis de extensión. A nai de Sinaí, Flora J.G., tamén lle recriminou esa actuación e foi golpeada coa tarima do posto nun costado.
A partir de aí iniciouse unha liorta con golpes de barras de ferro, empuxóns e outros ataques, na que se implicaron máis varias persoas, entre elas os 12 acusados, e outros familiares dun ou outro bando que acudiron a auxiliar aos feridos e que foron, á súa vez, golpeados. Como consecuencia da multitudinaria pelexa, resultaron feridos de diversa consideración varios feirantes, tanto do grupo ‘zamorano’ como da familia dos ‘Morones’. A Fiscalía atribúe aos acusados diferentes delitos de lesións.
PETICIÓN DE PENAS
No caso dos ‘zamoranos’, o ministerio público pide para Enrique L.S., Javier D.X., e José Luís J.E., tres anos e medio de prisión para cada un. Ademais, para estes e os outros catro acusados deste grupo (Luís L.S., Felipe S.J., Faustino J.B., e Manuel Jesús J.B.), pide multas que suman 8.100 euros, e que indemnicen aos feridos do ‘bando’ contrario en máis de 7.000 euros.
Por parte dos ‘Morones’, a Fiscalía solicita condenas que suman 24,5 anos de prisión. A maior pena, de 14 anos de cárcere, pídea para Sinaí G.J.; mentres que reclama 10,5 anos de cárcere tamén para a súa irmá María Consolo G.J.
Para estes e o resto de acusados (María Amelia C.M., Miguel Anxo V.B., e Rafael F.G.) reclama multas que suman 9.000 euros, e que indemnicen aos ‘zamoranos’ en máis de 20.700 euros.
CAUSAS PENDENTES
Ademais destas causas, Sinaí Giménez ten algúns procedementos xudiciais pendentes. O máis importante instrúese nun xulgado de Cangas, contra el e varios membros da súa familia, por supostos delitos de ameazas, branqueo de capitais, tenencia ilícita de armas, etc. (investigación relacionada coas supostas coaccións a feirantes).
Así mesmo, o chamado ‘rei dos xitanos de Galicia’ tamén está pendente da instrución iniciada nun xulgado de Salamanca, tras a súa detención (xunto a Miguel Anxo V.B.) cando foi interceptado levando nun coche 3 quilos de haxix, o pasado 14 de maio de 2019.
.
