O sindicato CUT denunciou este mércores que o goberno municipal de Vigo trata de paliar o déficit de persoal no servizo de bombeiros incorporando a funcionarios en prácticas, aos que esixe a mesma capacidade operativa que ao resto de persoal, a pesar de que cobran só 500 euros e de que non recibiron a formación adecuada.
A través dun comunicado, o sindicato lembrou que estes novos bombeiros, tras aprobar a oposición, tiñan un prazo de tres meses para recibir a formación obrigatoria para desempeñar o servizo, antes de incorporarse de forma progresiva e tutelada aos seus labores.
Con todo, asegurou a CUT, esta ducia de novos efectivos foi incluído no decreto de prestación de servizos, sen recibir esa formación, sen ser nomeados funcionarios de carreira e sen que saiban sequera cal é “situación laboral, salarial ou de seguridade”.
Segundo incidiron, estes funcionarios en prácticas deben realizar saídas, igual que o resto de bombeiros, mesmo en primeira intervención, a pesar de estar “discriminados salarialmente”, posto que só cobran 500 euros ao mes, e todo iso para paliar a falta de persoal neste servizo.
Por outra banda, a CUT tamén cuestionou o convenio asinado entre o alcalde, Abel Caballero, como presidente da FEMP, e a ministra de Defensa en funcións, Margarita Robles, para a incorporación de militares ás Policías Locais, e trasladaron a súa sospeita de que se queira usar este acordo para levar a cabo unha “cacicada” e cubrir postos “saltándose os requisitos que require un servizo público”.
