O alcalde de Vigo, Abel Caballero, criticou a “dubidosa solvencia democrática” da configuración do grupo municipal do PP, e pediu aos ‘populares’ vigueses e galegos que “se desculpen ante a cidade” polo “engano masivo” que supuxo a alteración da lista para a designación dos concelleiros.

Nunha rolda de prensa, o rexedor olívico tachou de “engano masivo” e “trampa masiva” a configuración do grupo municipal do PP con edís que non estaban nos primeiros postos da candidatura, e subliñou que o portavoz do devandito grupo, Alfonso Marnotes, era o número 20 nesa lista.

“É un engano masivo e unha tomadura de pelo á cidade (…). Xa lles votaron poucos, e aos poucos que os votaron, engánanos”, sentenciou Abel Caballero.

Tras os malos resultados do PP nas eleccións do pasado 26 de maio (pasou de 7 a 4 concelleiros), a que era cabeza de lista, portavoz municipal e presidenta local do partido, Elena Muñoz, presentou a súa dimisión, e tamén renunciaron os membros da lista.

O partido nomeou a unha xestora, dirixida pola exalcaldesa Corina Porro, que foi a que decidiu a configuración do novo grupo municipal, con Alfonso Marnotes (candidato número 20) como portavoz, acompañado por Jesús Marco González (número catro da candidatura), Patricia López Román (no posto 11 da candidatura) e Teresa Egerique (que se presentou no posto 18).