O alcalde de Pontevedra, Miguel Anxo Fernández Lores, recibiu este xoves ao reitor da Universidade de Vigo, Manuel Reigosa. No encontro, abordaron a necesidade de novos espazos ante a intención do Reitorado de solicitar novos graos para o campus local.

Así, analizaron as posibilidades de edificación dos terreos que a universidade ten na cidade. Durante a reunión Manuel Reigosa confirmou ao alcalde a aposta do Reitorado polo novo grao de Deseño e creación, así como polo desenvolvemento do Green Campus (o de Pontevedra é o único do Estado) para o que a Universidade solicitou a colaboración do Concello que poderá participar en decisións como minorar o ruído do tráfico na avenida de Compostela.

Así mesmo, demandou unha mellor sinalización do campus así como a posibilidade de abrilo ao río Lérez, empregando a canle da Illa do Cobo para instalar un pantalán que poida empregarse para os deportes náuticos.

Na súa primeira reunión co reitor da Universidade de Vigo, a concelleira Gloria Branco asegurou que o encontro foi “moi produtivo” e confirmou que este primeiro contacto continuará nos próximos meses con máis reunións bilaterais.